Mu gutangiza icyumweru cyo kwibuka ku nshuro ya 23 Jenoside yakorewe Abatutsi muri Mata 1994, Ambasaderi w’u Rwanda muri Leta Zunze Ubumwe za Amerika, Prof. Mathilde Mukantabana, yasabye Abanyarwanda, inshuti zabo ndetse n’abadipolomate bagera kuri 200 bitabiriye uyu muhango guhangana bivuye inyuma n’abapfobya Jenoside ndetse n’abagifite ingengabitekerezo yayo.

Iki gikorwa cyateguwe na Ambasade y’u Rwanda muri Amerika cyabereye i Washington, D.C kuwa 7 Mata 2017, aho abari bahateraniye bibutse banaha icyubahiro Abatutsi basaga miliyoni bahowe uko baremwe. Abitabiriye iki gikorwa bacanye urumuri rw’icyizere rugaragaza ko ahazaza h’Abanyarwanda hatekanye.

Amb. Mukantabana mu ijambo rye yasabye abitabiriye ibi bikorwa gufatana urunana mu bikorwa byo kurwanya uwo ari we wese uhakana Jenoside yakorewe Abatutsi.

Ati “Mu gihe twibuka ibihe bikomeye bya Jenoside yakorewe Abatutsi igihugu cyanyuzemo, haracyari umubare w’abayihakana. Usanga bishimira kuvuga ibihabanye n’ukuri kw’ibyabaye muri Mata 1994. Tugomba gukomeza gusigasira amateka yacu yose uko yakabaye, yaba ameza ndetse n’amabi.”

Abafashe umwanya muri ibi biganiro bagarutse ku mateka ya Jenoside yakorewe Abatutsi muri Mata 1994, baganisha ku nsanganyamatsiko y’uyu mwaka igira iti ‘Twibuke Jenoside yakorewe Abatutsi, turwanya ingengabitekerezo ya Jenoside, dushyigikira ibyiza twagezeho’.

Prof. Gatsinzi Basaninyenzi, Umuhanga mu bijyanye no gusesengura Jenoside, akaba n’Umwarimu w’Icyongereza muri Kaminuza ya Alabama A&M yagarutse ku buryo ipfobya rya Jenoside rikorwa.

U Rwanda rwashimwe uko rwiteje imbere mu myaka 23 ruvuye mu mwijima w’icuraburindi

Nyuma y’ibihe bigoranye igihugu cyanyuzemo, amahanga atangazwa n’uburyo cyahise cyiyubaka binyuze mu maboko y’abagituye barangajwe imbere na Perezida Kagame, ushimwa imiyoborere myiza.

Ubuhamya bwatanzwe Marcel Mutsindashyaka, rwiyemezamirimo warokotse Jenoside, igihe yari afite imyaka itanu. Yagarutse ku nzira ndende yanyuzemo ndetse n’uburyo yongeye kwiremamo icyizere akiteza imbere; kuri ubu akaba ari Umuyobozi w’Ikigo gikora ibijyanye n’Itangazamakuru, Umuseke Ltd.

Perezida wa Dickinson College yigisha by’umwihariko ibijyanye n’Amahoro n’Iterambere, Dr. Margie Ensign, yacyeje iterambere igihugu cyagezeho mu myaka 23 ishize nyuma ya Jenoside yakorewe Abatutsi kubera politiki ihamye idaheza.

Dr. Ensign yagaragaje Ubudehe ndetse n’Imihigo ku isonga ry’ibyagize uruhare mu kuzamura ubukungu n’imibereho myiza y’abatuye igihugu.

Ati “Imihigo ni uburyo bw’imiyoborere, tugomba kwibandaho mu gihe dushaka kureba niba abayobozi twatoreye kuhagararira bashyira mu bikorwa ibyo biyemeje.”

Mu gihe cyo kwibuka, Ambasade y’u Rwanda muri Amerika izakomeza kwifatanya n’Abanyarwanda baba mu bice bitandukanye muri iki gihugu mu biganiro bigamije gushimangira iterambere u Rwanda rumaze kugeraho mu mibereho myiza n’ubukungu nyuma y’amahano yarugwiriye.

 

Amb. Mukantabana yatangaje ko abakibaswe n’ingengabitekerezo ya Jenoside bagomba kwamaganwa

 

 

Abanyarwanda n’inshuti zabo bahuriye i Washington, D.C mu muhango wo gutangiza icyumweru cyo kwibuka ku nshuro ya 23 Jenoside yakorewe Abatutsi muri Mata 1994

 

 

SOURCE : IGIHE.COM