Umubyeyi Marie Claire ukomoka mu Karere ka Huye, utuye muri Leta Zunze Ubumwe za Amerika, yashyikirije abapfakazi ba Jenoside yakorewe Abatutsi inka z’imbyeyi eshanu mu bikorwa ngarukamwaka byo kuremera abatishoboye.

Iki gikorwa kiremera abarokotse Jenoside yakorewe Abatutsi barimo imfubyi n’abapfakazi, mu rwego rwo kubafasha kuva mu bwigunge no kwiteza imbere, cyabaye kuri iki Cyumweru, tariki ya 19 Werurwe 2017. Inka yatanze ziyongereye kuri esheshatu yatanze umwaka ushize.

Umubyeyi avuga ko ari igikorwa yiyemeje nyuma yo gukorwa ku mutima n’uburyo Abarokotse Jenoside bo mu Karere ka Gisagara bishyize hamwe muri ‘Association Duhozanye’ bagamije kwivana mu bwigunge no kwiteza imbere, nawe ahita yiyemeza kujya abatera inkunga.

Yagize ati “Aho mba mu mahanga nahagize inshuti nziza, nzibwiye “Duhozanye” bishimira intego ifite, biyemeza ko twafatanya kuyishyigikira, niyo mpamvu dukora ibikorwa nk’ibi byo kuboroza inka no kubaha ibindi bikoresho bifashisha mu mibereho yabo”.

Bamwe mu bakecuru bahawe inka bagaragaje akanyamuneza, bavuga ko bazitezeho ifumbire izatuma beza neza, bakabona n’amata yo kunywa.

Prudencienne Niringiyemungu wo mu Murenge wa Ndora ati “Mfite ibyishimo byinshi cyane, nabonaga abandi boroye inka zifite umukamo, nkavuga nti ‘ese Mana ko nta bushobozi mfite bwo kuyigurira bizagenda bite ?’ None inka ndayibonye. Izamfasha kubona amata n’ifumbire, ndumva nezerewe kuko ngiye gutera imbere”.

Cecile Mukabaziga utuye mu Murenge wa Save, wayihawe umwaka ushize avuga ko yamufashije mu kongera umusaruro mu buryo butandukanye.

Yagize ati “Umwaka ushize ku munsi nk’uyu nibwo bampaye inka, ku bw’amahirwe nayitwaye ihaka ihita ibyara. Bayimpaye mfite ikibazo cy’ifumbire none cyarakemutse, nahise ntekereza n’umushinga wo guhinga urutoki ndawutangira. Kuri ubu nywa amata, ndumva ubuzima mbayemo ari bwiza.”

Perezida w’ishyirahamwe Duhozanye, Daphrose Mukarutamu, avuga ko bibumbiye hamwe bagamije kwikura mu bwigunge no kwiteza imbere, kandi bishimira ko bagenda babigeraho ndetse n’abagiraneza bakaba bakomeje kubatera inkunga.

Ati “Kugeza ubu abantu twese twibumbiye hamwe muri Duhozanye turanezerewe kuko tumaze kugera ku ntera ishimishije, kandi mu byo twagezeho harimo uruhare rwa Claire Umubyeyi, kuko amaze kubona ibyo dukora yarabyishimiye yiyemeza kujya adutera inkunga”.

Yakomeje asobanura ko kugeza ubu Duhozanye ibumbiye hamwe abanyamuryango bagera ku bihumbi bitatu kandi bose bamaze kwiyubaka kuko bafite amatsinda agera kuri 60 abahuza.

Ati “Ayo matsinda rero turayakurikirana, buri tsinda riba rigomba kugira konti yaryo n’amafaranga runaka bazigamaho, ku buryo umunyamuryango ashobora kwaka inguzanyo akiteza imbere cyangwa agakemura ikibazo”.

Abanyamuryango ba Duhozanye bakora ibindi bikorwa by’amajyambere, nko kuba aribo bashinzwe gukwirakwiza ibinyobwa bya Bralirwa mu Karere ka Gisagara no mu gice kimwe cy’Akarere ka Huye.

Ibi bikorwa bituma abana bagizwe imfubyi na Jenoside babona akazi kabaha amafaranga kuko abagera kuri 15 bakora ku bubiko b’ibinyobwa bikorwa na Bralirwa ziri hirya no hino mu Karere ka Gisagara no muri Huye.

Aba bana kandi nibo bafasha Duhozanye kwiga imwe mu mishinga itandukanye y’iterambere no kuyishyira mu bikorwa.

Abarokotse Jenoside bo mu Karere ka Gisagara bemeza ko bamaze kwiyubaka

Daphrose Mukarutamu ( ibumoso) ashimira Marie Claire Umubyeyi ku bikorwa byiza abakorera

Umwe mu bagororewe yizeye ko inka yahawe izamufasha muri gahunda zitandukanye

Inka zorojwe bamwe mu barokotse Jenoside bo mu Karere ka Gisagara

prudence@igihe.rw