Minisitiri w’Urubyiruko na Siporo muri Turikiya, Dr Osman Aşkın Bak, yatangarije Abanyarwanda n’inshuti zabo bitabiriye ibirori by’Umunsi wo Kwibohora ku nshuro ya 24 ko u Rwanda ari igihugu kibadukanye ingoga ku mugabane wa Afurika bitewe n’umuvuduko w’iterambere.

Ibi birori byabereye mu Mujyi wa Ankara ku wa 4 Nyakanga 2018, byitabiriwe n’abarenga 300 barimo abambasaderi, abashoramari bakomeye bo muri Turikiya, abarimu muri za kaminuza, inshuti z’u Rwanda n’Abanyarwanda baba muri iki gihugu.

Minisitiri Dr Osman Aşkın Bak wari uhagarariye Turikiya muri uyu muhango yagaraje ko igihugu cye cyishimira intambwe y’u Rwanda n’uko rumaze kuba icyitegererezo mu mahanga.

Yagize ati “U Rwanda ruri mu bihugu bizamuka neza muri Afurika kandi Turikiya yishimira uruhare rwarwo mu mibereho myiza n’ubukungu bw’igihugu kiri mu maboko y’ubuyobozi bwiza bwa Perezida Kagame. Twizeye ko Perezida Kagame ari gutanga umusanzu ukomeye mu mavugurura y’Umuryango wa Afurika Yunze Ubumwe ayoboye.”

Yashimiye Guverinoma y’u Rwanda imaze gutera intambwe ifatika nyuma y’amateka igihugu cyanyuzemo; anashimangira ko umubano w’ibihugu byombi uzakomeza kubungwabungwa by’umwihariko mu kongera imbaraga mu bucuruzi buhuriweho.

Mu mwaka ushize u Rwanda na Turikiya byakoresheje miliyoni 42 z’amadolari ya Amerika mu buhahirane hagati y’impande zombi.

Turikiya ifitanye ubufanye na Afurika ndetse mu 2017 u Rwanda rwabaye igihugu cya gatandatu cyasinye amasezerano y’ubufatanye mu by’ubuhinzi.

Aya masezerano akubiyemo ubufatanye mu nzego 13 zirimo iterambere ry’uruhererekane nyongeragaciro k’ibikomoka ku buhinzi n’ubworozi, inganda ziciriritse zitunganya umusaruro n’ikoranabuhanga mu kuwuhunika; yashyizweho umukono na Minisitiri wa Turikiya Ushinzwe Ubuhinzi n’Ubworozi, Faruk Celik na Ambasaderi w’u Rwanda muri icyo gihugu, Williams Nkurunziza, ubwo hasozwaga Inama y’Abaminisitiri b’Ubuhinzi ba Afurika na Turukiya, ku wa 28 Mata 2017.

Ibindi bihugu byayasinye ni Repubulika Iharanira Demokarasi ya Congo, Côte d’Ivoire, Guinea, Gambia na Djibouti.

Minisitiri Osman yavuze ko Turikiya izakomeza gukorana n’uyu mugabane no guha agaciro uko wishakamo ibisubizo by’ibibazo ufite.

Ambasaderi w’u Rwanda muri Turikiya, Williams Nkurunziza, yavuze ko kwifatanya n’Abanya-Turikiya muri ibi birori bishimangira gukomeza umubano hagati y’ibihugu byombi.

Yavuze ko Umunsi wo Kwibohora ugaragaza guha agaciro ingabo zari iza FPR Inkotanyi zayobowe na Perezida Kagame zitanze zikarokora u Rwanda, rukongera kubamo umudendezo usesuye.

Yagize ati “Perezida Kagame yari ku ruhembe mu rugamba rwo kwibohora kandi igihugu kizahora kimushimira akazi k’indashyikirwa yakoze ndetse na Guverinoma ikaba ikomeje gufasha abagituye.”

Ambasaderi Nkurunziza yanashimiye Abanya-Turikiya muri Kamena bongeye kugirira icyizere Perezida Recep Tayyip Erdogan cyo gukomeza kuyobora iki gihugu mu myaka itanu iri imbere, ashimangira ko amatora yabaye meza.

Abitabiriye ibi birori basusurukijwe n’abanyeshuri b’Abanyarwanda biga muri Kaminuza ya Duzce binyuze mu ndirimbo n’imbyino gakondo. Baneretswe amashusho agaragaza urugamba rwo kwibohora n’ay’ibyiza nyaburanga bitatse igihugu.

 

 

Abanyarwanda baba muri Turikiya bifatanyije n’inshuti zabo mu birori byo kwizihiza Umunsi wo Kwibohora

 

Ambasaderi w’u Rwanda muri Turikiya, Williams Nkurunziza, ashyikiriza Minisitiri w’Urubyiruko na Siporo muri Turikiya, Dr Osman Aşkın Bak impano

 

Ibi birori byatangijwe n’indirimbo yubahiriza igihugu

 

 

Abantu b’ingeri zitandukanye barimo abanyapolitiki n’abacuruzi nibo bitabiriye iki gikorwa

 

Itsinda ryasusurukije abitabiriye ibi birori ryafashe ifoto y’urwibutso na Ambasaderi Nkurunziza Williams na Minisitiri Dr Osman Aşkın Bak

 

Minisitiri w’Urubyiruko na Siporo muri Turikiya, Dr Osman Aşkın Bak, yagereranyije u Rwanda n’inyenyeri imurikira amahanga